فيديو انتشر لليوتيوبر كريم السيد مستضيف فيه شباب اتكلموا عن تدمير حياتهم بسبب القمار الإلكتروني لكن اللي شد الناس الشاب الأسواني منتصر محمد اللي حكايته كلها صدمات
منتصر حكى إنه كان تاجر ناجح وعنده محلين لبيع وصيانة أجهزة الكمبيوتر وكان شغله ماشي تمام لكن الفضول خلاه يجرب القمار مرة لما شاف اللعبة بالصدفة ومن هنا بدأت الحكاية
اللعبة جرّته واحدة واحدة وبقى كل يوم يخسر أكتر من اللي قبله لحد ما بدأ يبيع الأجهزة بالخسارة وياخد فلوس من ناس بحجة انهم يشاركوه لكنه خسرها كلها بعد ما حطها في القمار
قال للناس انه مسافر بعد ما خد دهب مراته باعه جنب بعض أثاث البيت ولعب بيهم قمار وخسرهم بردو كلهم وساعتها وخسارته وصلت وقتها لـ3 مليون جنيه ولما الدنيا اتسدت في وشه ساب بلده وهرب للقاهرة لوحده
لما هرب قضى شهر كامل في الشارع وبعدها اشتغل بواب لعمارتين بعد ما صاحبهم عرض عليه الشغل لما شافه نايم في المسجد لكن طمع تاني وسرق الإيجارات من السكان والجمعية الخيرية التابعة لصاحب العمارتين ولعب بالفلوس كلها لكنه بردو خسرهم
منتصر رجع يواجه نفسه لما لقى ان ديونه وصلت لـ800 ألف جنيه وقال في الحلقة إنه خسر كل حاجة بيته وولاده وكرامته وقال جملة وجعت الناس كلها: كنت بصلي عشان ربنا يرزقني في شغلي دلوقتي بصلي عشان يرزقني في القمار وأكسب
القمار الإلكتروني مش لعبة ولا تسلية دي حفرة الضحية بتقع فيها واحدة واحدة لحد ما تبيع اللي وراك واللي قدامك وتخسر نفسك قبل أي حاجة
دار الإفتاء المصرية أكدت إن المراهنات والقمار الإلكتروني حرام شرعًا لأنها أكل للمال بالباطل وقالت كمان إن أي لعبة فيها فلوس ومخاطرة تعتبر ميسر والميسر ربنا حرّمه صراحةً في القرآن