القضية الفلسطينية حاليًا هي أكتر حاجة بتشغل بالنا، ومتصدرة الساحات العربية عامة والمصرية بشكل خاص، بسبب مجازر الاحتلال واللي بيعمله في أهلنا في غزة، وفي الوقت الحالي ندعم فلسطين بأي طريقة حتى بالأعلام والكوفيات الفلسطينية، لكن الكوفية (الشال) الفلسطيني تحديدًا هنلاقيه في معظم البيوت المصرية من قبل حتى الأحداث الأخيرة، فهل يا ترى طول عمره رمز للمقامة ولا إيه حكايته؟ وإيه دلالات النقوش الموجودة فيه؟
تعالى نحكيلك دلالة نقوش الشال الفلسطيني ورحلة تحوله من استخدام الفلاحين لحد وصوله للمقاومة
بداية استخدامه تحديدًا كانت عند الفلاح الفلسطيني اللي كان بيلبسه في الحر لتخفيف الحرارة أو البرد عشان المطر، بحسب مركز بيت المقدس للدراسات التوثيقية
ولكن مع صدور وعد بلفور بإنشاء وطن قومي لليهود، وتوسعهم لاحتلال الأرض، بدأ الفلسطينيين في مقاومتهم، فبقوا يلبسوا الشال عشان يغطي وشهم والاحتلال ميعرفهمش
من وقتها، ارتبط الشال الفلسطيني بالكفاح الوطني للشعب الفلسطيني، وظهر دوره أكتر في ثورة 1936 لما الفلاحين الفلسطينيين ثاروا أثناء وجود الانتداب البريطاني
أما بالنسبة لدلالات النقوش الموجود فيه، فهو فيه 3 أنماط رئيسية مختلفة عن بعضها، بتتكون من الخط العريض، وأوراق الزيتون، وشبكة صيد الأسماك.
الخط العريض بيرمز للطرق التجارية اللي بتمر عبر فلسطين، أما شبكة صيد السمك تمثل العلاقة القوية بين البحار الفلسطيني والبحر، وأوراق الزيتون بتمثل قوة وصمود الشعب الفلسطيني.
