انهارده هنحكيلكم عن واحد من أهم مساجد محافظة سوهاج، بيرجع تاريخه للقرن الثامن الهجري، واتعاد بناه في عهد الرئيس الراحل جمال عبدالناصر سنة 1968، واتجدد تاني سنة 1993، وأخر تطوير ليه كان من فترة قريبة في مبادرة إعمار بيوت الله، والتطوير مكانش على المسجد بس، لكن حصل تطوير كمان لساحة المسجد من بره، واتكلفت تطوير ساحة وميدان مسجد العارف بالله 6 مليون جنيه.
المسجد اتصمم شبه ساحة ميدان سيدنا الحسين اللي في القاهرة، وبيقسم الميدان لـ 3 مناطق، واتعملت مظلات إلكترونية عشان تحمي زوار المسجد من لهيب الشمس، وفيه مصحف مجسم ضخم وسط الميدان طوله 5 متر.
مساحة المسجد حوالى 7000 متر مربع، وله مئذنتين كبار بينهم شخشيخة كبيرة أوي، وفى جناح فيه ضريح العارف بالله نفسه، اللي الناس بتجيله من كل محافظات مصر، سواء من الجنوب أو من بحري، وللضريح ده مدخلين واحد للرجالة، وواحد للستات، وجمب المسجد قبر مراد بك وده كان حاكم جرجا أيام دولة المماليك.
العارف بالله اسمه الحقيقى “إسماعيل بن على بن عبدالسميع بن عبدالعال اليمانى، ولقبه حسين أبو طاقية، وليه لقب تاني هو فحل الرجال.
اتولد العراف بالله يوم 4 ذي القعدة سنه 724 هجرية بتلمسان في دولة المغرب، وسافر وجه مصر وقعد في محافظة سوهاج، وهو من عائلة الأشراف، له 3 أخوات اللي هما: “الشريف عبدالظاهر، شهاب الدين، والشيخ عبدالكريم”، وكل واحد منهم عنده مقام في محافظة قنا.
حفظ العارف بالله القرآن الكريم كامل وهو عنده 7 سنين بس، وكان عالم فى علوم الفقه والحديث والسنه، ومات يوم الجمعه 2 رجب سنه 795 هجرية.
