تعرف إن في قرية في مصر مش بيعيش فيها غير الستات بس، وممنوع دخول الرجالة، تعالى نحكيلك الحكاية.
قرية السماحة في أسوان، تتبع مدينة إدفو، وأسستها الحكومة المصرية لتضم المطلقات والأرامل سواء معيلات أو غير معيلات، وحاليًا كمان بتضم فتيات، ولو ست قررت تتجوز بتمشي من القرية فورًا.
قرية السماحة على بعد حوالي 120 كيلومترا من مدينة أسوان، واتأسست سنة 1998 كجزء من مشروع “وادي الصعايدة”، للوهلة الأولى لما تقرب منها هتحس إنك رايح منطقة جبلية، لكن مجرد ما هتدخل هتلاقيها جنة زراعية اتبنت بعرق ومجهود سيدات شريفة بتسعى وتكافح عشان لقمة عيشها.
نشاط النساء في القرية عبارة عن الزراعة وتربية الفراخ والمواشي ونشاط الرعي عمومًا لتكون مصدر رزق لهم، ووفقًا للمُعلن من المفترض أنه بيتم منح كل سيدة منهن منزلا وقطعة أرض مساحتها 6 أفدنة.
بيتم تقديم كتير من المساعدات لسيدات قرية السماحة من خلال القائمين على المشروع أو المنظمات الدولية، فيتم توفير أثاث ومفروشات وأدوات زراعية ومستلزمات الزراعة، ومنحهم قروض قصيرة الأجل بيتم تسديدها بعد مرور سنة واحدة، وكمان قروض لتربية الحيوانات يتم تسديد قيمتها خلال 3 سنوات.
منازل السيدات مكونة من طابق واحد، وبتلقى دعم من الحكومة، يعني بتسدد السيدة الأقساط مقابل الانتفاع بها، ولكن إن ثبت إنها متجوزة بيتسحب منها الأرض والبيت وكل المنافع ومبيكونش لها مكان في القرية.
