الصيام عند المصريين القدماء ماتمش تدوينه على النقوش أو البرديات لكن بعض الباحثين قالوا إن المصريين القدماء عرفوا الصيام… إيه الحكاية؟
الصيام عند المصريين القدماء كان فريضة بيتقربوا بيها لأرواح الأموات وكانوا بيعتقدوا أن صيام الأحياء بيرضي الأموات لأنهم محرومين من طعام الدنيا وهو نوع من التضامن معاهم
بعض الأثريين قالوا إن كلمة صوم في اللغة الهيروغليفية معناها: امتنع عن الطعام أو الشراب وهي عبارة عن “صاو” أي امتنع أو كبح والـ “م” معناها من أو عن
كان فيه نوعين من الصيام: صيام الكهنة وصيام الشعب.. صيام الكهنة وفيه الكاهن قبل ما يلتحق بالمعبد بيمتنع عن الطعام الشراب ومعاشرة النساء من 7 إلى 42 يوم متتالي من طلوع الشمس لغروبها
في البداية بيمتنع الكاهن عن اللحوم والنبيذ بعد كده بيمتنع عن أي أكل فيه روح وبيعيش على الخبز والشعير والماء بعد كده بيمتنع عن كل أنواع الطعام والشراب
أما الشعب كان بيصوم في الأعياد زي عيد وفاء النيل وعيد الحصاد و4 أيام من كل سنة في فصل الفيضان وكان بيمتنع الشعب عن الطعام والشراب والنساء من طلوع الشمس لحد الغروب
