تداول رواد مواقع التواصل فيديو لمضيفة طيران اتكلمت بطريقة اعتبرها البعض مسيئة لأهالي سوهاج وأبناء الصعيد وده أثار غضب واسع ومطالبات بمحاسبتها
في البداية انتشرت شائعات إن المضيفة شغالة في مصر للطيران لكن الشركة نفت الكلام ده وأكدت إن صاحبة الفيديو مش من العاملين عندها وإنها بتعتز بكل أبناء الشعب المصري وخاصة أهالي الصعيد
وبعدها اتضح إن المضيفة بتشتغل في شركة إير كايرو واللي أعلنت إنها أوقفتها عن العمل وأحالتها للتحقيق وأكدت إن اللي حصل تصرف شخصي لا يمثل الشركة وإنها بترفض أي إساءة أو تمييز ضد أي مواطن
الواقعة أثارت غضب كبير على مواقع التواصل والبعض شاف إن الكلام اللي اتقال في الفيديو كان إساءة لأبناء الصعيد وتجاوز انتقاد سلوك بعض الركاب وطالبوا باتخاذ إجراءات حاسمة ضد المضيفة
كمان أعلنت نقابة محامي سوهاج اتخاذ إجراءات قانونية وقدمت بلاغ للنائب العام للمطالبة بإحالة صاحبة الفيديو للمحاكمة باعتبار إن ما ورد فيه يمثل إساءة لأهالي سوهاج وأبناء الصعيد
وأعلن عدد من أعضاء مجلس النواب تحركهم لمتابعة الواقعة وتقديم طلبات إحاطة مؤكدين رفضهم لأي محتوى فيه تنمر أو تمييز ضد أي فئة من فئات الشعب المصري
