مع قرب معاد مولد النبي الشريف، المسلمين في كل مكان في مصر بيحتفلوا بطرق مختلفة بولادة أعظم وأطهر البشر سيدنا محمد رسول الله، ولإن طبعًا صعيدنا مختلف بأهله وناسه، هو كمان مختلف في احتفالاته بأي مناسبة، والنهاردة هنكلمكم إزاي الصعيد بيحتفل بالمناسبة الجميلة دي.
“الحضرة” وهي حلقات الذكر، دي حاجة تعتبر ثابتة في معظم محافظات الصعيد، وبيبقى فيها روحانية وطاقة نور جميلة، بتقعد الناس كلها تذكر ربنا وتنشد في حب الرسول في جو مريح للنفس والأعصاب، وكمان بيتم الاحتفال عن طريق تجهيز الولائم المختلفة والمشروبات وأبرزها بيكون مشروب القرفة باللبن وأوقات بيكون الشربات.
كمان المرماح والخيول والتحطيب، من أبرز مظاهر الاحتفال بمولد النبي في الصعيد تمًا، ومشهورة بيه محافظات معينة زي الأقصر وقنا.
مثلًا في سوهاج، هنلاقي إنها عادة أساسية شرا حلاوة المولد والتوزيع منها بكرم على القرايب والجيران والأحبب، وكمان بيتم تنظيم ليال للإنشاد الديني وقصائد مدح الرسول عليه الصلاة والسلام وآل البيت، خاصة في مدينتي جرجا والبلينا، والعادات دي مختلفة عن عادات زمان، لإن من حوالي 30 سنة كان بيتم الاحتفال من خلال تنظيم زفة لجمل عليه هودج مكسي بالقماش الأخضر ويطوف في قرى المحافظة، وبيمشي وراه الأهالي يذكروا ربنا وينشدوا في حب الرسول وكإنها مسيرة ذكر.
بيقدموا كمان أكلات بسيطة، زي الفول النابت والرز باللبن والطبيخ وبيتوزع على الموجودين سواء محتاجين أو لأ، على سبيل الصدقة والاحتفال في نفس الوقت.
أما في محافظة المنيا، فبيكونفي حاجة اسمها “زفة المولد”، ودي عبارة عن مسيرات كدة للأهالي فيها خيول وطبل وسيوف خشب، وزفة المولد متواجدة في معظم قرى المنيا.
قرية القيس في المنيا الموجودة في مركز بني مزار، ليها احتفال مختلف بعض الشيء، هما برضو بيعملو “زفة مولد النبي”، لكن بقى بيشارك جميع العائلات بالقرية وبيرددوا أناشيد وأذكار ومدح سيدنا النبي، وبتجوب الشوارع الرئيسية بليل تحديدًا.
كمان قرى زي البهنسا، بيخرج فيها نفس الزفة، لكن مع اختلاف إنه بيسبقها أمسيات وسهرات للذكر، ودا بيستمر لمدة أسبوعين كاملين.
أما بني سويف، ففي قرى كتير فيها بتحتفل على الطريقة الصوفية، يعني بيعملوا مسيرة فيها خيول، وبيرفعوا الرايات الخضرا والحمرا، ويطوفوا بيها في الشوارع بالذكر والمدح.
الشيخ ياسين التهامي طبعًا بيكون ليه وجود بارز جدًا في احتفالات الصعيد تحديدًا، وبالفعل زار بعض المحافظات وأقام فيها حلقات ذكر وإنشاد اليومين دول، منهم قنا على سبيل المثال، وكان متواجد في مولد العارف بالله الشيخ جلال الكندي، واللي بيحرص على حضوره ناس من مختلف المحافظات مش قنا بس.
الاستعدادات للمولد دا كانت بطرق مختلفة منها ذبح العجول وتجهيز اللحوم، وتقديم الغدا والعشا للموجودين بحلقات الذكر، واللي غالبًا بتكون لحمة ورز وبطاطس، وبيستمر دا على مدار أسبوعين تقريبًا.
أما في الأقصر، فهي مشهورة في احتفالها بالمرماح والخيول، والسنة دي كالعادة تم تنظيم حلقات التحطيب وسباقات مرماح الخيول بمشاركة نجوم الخيالة من عائلات قرى ونجوع الأقصر ومحافظات الصعيد.
