رغم تخلي بعض أماكن الصعيد عن عاداتهم وتقاليدهم بسبب الزمن والسوشيال ميديا وحاجات كتير، إلا إن محافظة أسوان وتحديدًا النوبة من أكتر الأماكن في مصر اللي محافظة على معظم تراثها وعاداتها وتقاليدها لحد دلوقتي، وخصوصًا في أفراحهم ومناسباتهم.، ومأثرتش عليهم السوشيال ميديا زي مختلف المحافظات التانية، لكن طبعًا أفكارهم اتطورت وبقى مش لازم الولد يتجوز من ولاد عمه، وإن البنت مينفعش تتجوز برة النوبة، يعني ببساطة بعض الأفكار تطورت لكن العادات التراثية اللي فيها هويتهم لسة صامدة.
وزي ما معروف إن رقم 7 مميز في الحياة والقرآن زي 7 سموات وأراض، فكمان الرقم دا مميز عند النوبيين، وموجود في أكتر من عادة عندهم، زي إنهم بياخدوا 7 مرات من التراب اللي بيمشي عليه شخص عزيز عليهم بيسافر، ويحفظوا بيها عشان يرجع بالسلامة ويرموها عند عتبة بابه، وكمان بياخدوا الطفل المولود مجرد ما يتم أسبوع، يعني في اليوم السابع من ولادته، وأهله يغسلوله وشه من النيل.
كمان من ضمن العادات، هي أن أي اتنين متحوزين جداد يلفوا حوالين نخلة 7 مرات وهما ماسكين عود أخضر فيه 7 ورقات، لكن دا حاليا قل إلى حد ما، وكانزا بيعملوه لكون النخل رمز للخير الكتير والعمار، ولما العريس يتجوز مش بيخرج من بيته غير اليوم السابع.
ولو رحنا لعادات الجواز، فبعض العائلات في النوبة بتحتفل بالأفراح لمدة 7 أيام ورا بعض، وعائلات تانية بتحتفل لمدة يومين نتيجة للأسعار اللي غليت حاليًا، يوم الحنة مثلًا ليه طقوس خاصة، بيلبس العريس الجلابية الصعيدي، وبيشغل الأغاني النوبي وبعدين بيكون في حفل ذكر وقرآن كريم، وبيدبح فيها أهل العريس وكمان بيكون موجود قاريء قرآن معروف، فالناس تاكل وي بتسمع الآيات بصوت الشيخ.
قبل الحنة بيوم بيكون في يوم اسمه “الشيلة”، ودي بيكون فيها شنط وهدايا للعريس وبيكون فيها ملابس سودانية وعطور، ويوم الحنة ده شرط أساسي العروسة بترسم فيه الحنة وكمان بيكون في عروض ترفيهية والناس كلها بتكون لابسة ملابس بألوان مبهجة
أما ليلة الفرح بيجيبوا فنان نوبي والعريس بيرقص وسط أهله وصحابه، وكمان بيسلم على كل واحد من المعازيم وياخد النقطة بتاعته ولما يوصل العروسة والعريس لبيت الزوجية لازم يشربوا اللبن على باب الشقة قبل ما يدخلوا عشان دي علامة إن حياتهم هتبقى سعيدة وفيها خير وبركة.
وبالنسبة للأعياد، في حاجة اسمها ليلة الفروسية، بتتعمل تاني يوم العيد، ودي بتكون فيها الخيول من كل مراكز المحافظة بتتسابق فيها وبيتعمل أكل كتير وبيتعشي فيها الناس اللي بتيجي تحضر الليلة.
