الحبرة والتوب، هما أكتر حاجات مميزة ومهم جدا في جهاز البنات في الأقصر وهي بتتجوز، مهما كان علامها لو جاهلة أو معاها دكتوراه، من عين الاعيان او من الناس البسيطة، لازم الحبرة والتوب في الجهاز قبل ما تروح للعريس، وهما حاجتين عبارة عن جلبية واسعة جدا وطرحة طويلة شبه الشال.
بيرجع السبب لدا إنهم بيتفائلوا بيه، وبيعتبروه موروث أساسي ضمن عاداتهم وتقاليدهم وقت الجواز، واستمرت العادة دي لحد دلوقتي، ومش بس كدة، كمان بيعتبروا في الأقصر البنت اللي تحلم إنها لابسة الحبرة والتوب هيتقدملها عريس وهتوافق عليه، يعني علامة على الحظ السعيد، وكمان رمز للستر، وبيقولوا كمان لو الست متجوزة وحلمت إنها لابسة الحبرة يبقى ممكن تكون هتخلف ولد.
أكتر مكان في الأقصر محافظ فيه السيدات والبنات على الحبرة والتوب وقت الجواز، هو مركز إسنا، وهتلاقي إن بعض السيدات لسة بتلبسه كمان، وكل ما تدخل أكتر في الصعيد الجواني هتلاقيهم بيحافظوا على العادات والتقاليد والموروثات الشعبية بشكل أكبر، وهتلاقي إن سيدات كتير لابسين الحبرة والتوب وحابينه، لإنهم مؤمنين إنه واسع ومحتشم وبيستر الجسم كله من غير ما يبان طرف منها، وبيحرص عليه جدا الستات المتجوزة بالتجديد، عشان كدة هو جزء أساسي في الجهاز.
سن الست اللي بتلبس الحبرة بيفرق من وحدة للتانية، مثلا الستات الكبار في السن هتلاقيهم بيلبسوا دايما حبرة سودة، مفيهاش أي نقشات أو لون مختلف يلفت النظر أو يميزها، نظرا لطبيعة سنهم الوقورة، أما العرايس الصغيرين أو البنات اللي قربوا على الجواز لكن حابين يلبسوه بيحرصوا إن يكون أسود وفي نقشات بألوان مختلفة زي الموف مثلا.
قرى كتير العرف السائد فيها هو لبس الحبرة والتوب، مهما كانت ثقافة البنت أو طبيعتها، ولو معملتش كدة بتحس إنها غريبة كعن قريتها، وكمان بتلاقي هجوم على دا لكونها مش ملتزمة باللبس اللي كل الستات لبساه عندهم.
الحبرة بتتلبس بأشكال مختلفة حسب كل قرية أو حسب ما كل ست تكون عايزة، يعني في بعض السيدات بيبحبوا يلبسوها كإنها نقاب، ميبانش منهم غير عنيهم، وفي اللي بتغطي كمان عنيها بالشكل اللي يتيح ليها تشوف الشارع عشان تعرف تمشي، لكن متكونش عنيها ظاهرة بشكل واضح، وفي سيدات تانية بتبين وشها وتحط الباقي على راسها وباقي جسمها.
