بيقولوا إن فيه في البندر عمرو دياب لكن عندنا في قبلي فيه كروان اسمه أحمد عادل،
ولدنا أحمد عادل أحمد حفني اتولد في مدينة نقادة في محافظة قنا.. ونقاده مدينة في الصعيد مبنية على الضفة الغربية بتاعة نهر النيل قدام مدينه قوص وواحدة من أقدم المدن فى مصر كلها وبيرجع تاريخها لعصر قبل الأسرات وكان اسمها وقتها اومبوس وفى مصر القديمة كان بيسموها نوبت يعنى دهب وسموها كدا عشان مناجم الدهب القريبة منها فى الصحراء الشرقية.
فمكنش غريب إن كروان الصعيد يكون من نقاده بلاد الدهب لأن صوته زي الدهب.. وعاش أحمد عادل في حضن أبوه اللي وصاه وقاله (يا ولدي إوعى الخسيس تماشيه) وبدأ يغني وهو عنده 13 سنة في فرقة بسيطة مع خاله الفنان محمود سليم المشهور بكوكب الصعيد والعازف أحمد علي ولقبه أحمد القط.
طور كروان الصعيد موهبته وتعب على نفسه أكتر واكتسب شهرة في ملقته من غناه في العشية بالأفراح، واستمر كدا كام سنة واتشهر بالأغاني الشعبية (ع القسوة اللي هتموتنا والصبر اللي بقى صبار).
وبعدها استقل وعمل فرقته الخاصة وغنى معاها (ما تصفى يا ليل وتروق يا ليل من دون الناس رفضنا الكاس جبر الزمان وسجانا العذاب والمواجع) فصيته على أوي في الأفراح والحفلات في الصعيد الجواني ونزل أغنية (بنت عمي خدوها غراب) وحققت نجاح وانتشار كبير وكانت بداية انطلاقته الحقيقة اللي بيقول فيها (وبحبك والله بحبك.. ولا غير حبك قيدنا الليل.. يا دمعتي لا تنزلي قلبي عليهم يغلي غلي).
ع الساوند أحمد ليه صيت ومسمع جدا بحري وقبلي وإن قبلي أكتر.. لدرجة إنك هتلاقي أغاني معدية مليون ونص وأقل أغانيه سمعها 90 ألف بني أدم وتعليقات جمهوره ع الساوند تبين لك قد ايه هو مؤثر في الناس اللى بيسمعوه خصوصا اللي من الصعيد الجواني زي مثلا تعليق (قول يا أحمد عادل فرح بوابت الرجال الحزين).
ومن أشهر أغاني كرواننا في الصعيد الجواني: كوكب الصعيد ونجم الجيل وماشي على مهلي والوجع.